Addasiad Cymraeg gan Mared Llwyd o'r nofel Sweet Pizza gan G. R. Gemin yw Caffi Merelli. Enillodd y nofel Saesneg wobr Tir na n-Og yn 2017, fe'i henwebwyd hefyd am wobr nodedig Carnegie, yn ogystal ag ymddangos ar restr hir Gwobr Lenyddiaeth Plant papur newydd y Guardian. Mae Joe yn fachgen 14 mlwydd oed sy'n ymdrechu i gadw caffi'r teulu yn nhref Bryn Mawr ar agor, caffi a agorwyd am y tro cyntaf gan ei hen dad-cu - Nonno - ddaeth i Gymru o'r Eidal yn ugeiniau'r ganrif ddiwethaf. Cydblethir stori Joe gyda hanesion ei dad-cu am y caffi a chyfnod tywyll yr Ail Ryfel Byd, wrth iddo gofnodi ei atgofion ar dap i'w wyr tra ei fod yn glaf yn yr ysbyty. Drwy atgofion Nonno, down i ddysgu am garchariad yr Eidalwyr yng Nghymru yn ystod y cyfnod, ynghyd a hanes suddo'r SS Arandora Star, llong oedd yn cario rhai o'r carcharorion rhyfel hynny o Brydain i Ganada. Wrth i Joe ddysgu mwy am hanes y teulu, cynyddu mae ei ddiddordeb yn ei hunaniaeth Eidaleg. Mae'n awchu i ddeall mwy am ei dreftadaeth, yr iaith a'i harferion, y bwyd ac yn fwyaf annisgwyl i fachgen ifanc yn ei arddegau efallai, opera. Llwydda G. R. Gemin, a Mared Llwyd drwy ei haddasiad medrus, i gyflwyno themau pwysig fel perthyn a mewnfudo mewn modd ysgafn, hynod ddarllenadwy. Wrth i Joe a'r teulu geisio dod i dermau gyda salwch Nonno a thranc y caffi, llwydda'r awdur i gyfleu eu perthynas a'i gilydd mewn modd cynnes a chredadwy. Mae cymuned Bryn Mawr ddoe a heddiw, a'i chymeriadau hefyd wrth galon y nofel. Ceir yma ystod o gymeriadau amrywiol sy'n llwyddo i wthio'r stori yn ei blaen yn araf a phwyllog; cymeriadau fel ffrind gorau Joe, Combi; Mimi ei gyfnither o'r Eidal ddaw i gynorthwyo yn y caffi yn dilyn salwch Nonno; yn ogystal a theulu Malewski ddaeth o wlad Pwyl yn wreiddiol, sy'n rhedeg siop gyferbyn a'r caffi. Mae tudalennau'r gyfrol yn gorlifo gan ddisgrifiadau byw o fwydydd Eidalaidd amrywiol sy'n tynnu dwr i'r dannedd. I'r sawl sy'n awchu i fynd i arbrofi yn y gegin wedi'r darllen ceir ambell rysait ar gyfer rhai o brydau'r nofel ar ddiwedd y llyfr, ynghyd a mwy o wybodaeth gan yr awdur am gerddoriaeth opera. Dyma nofel amserol a fydd yn siwr o gynhesu'r galon. Wedi ei haddasu'n grefftus gan Mared Llwyd, llwydda nid yn unig i ddathlu cyfraniad aruthrol mewnfudwyr i'n cymunedau, ond hefyd ein treftadaeth gyfoethog Ewropeaidd fel cenedl yn ogystal. -- Mari Sion @ www.gwales.com
